Петропавлда тоғызқұмалақтан облыстық мектеп лигасы өтті. Аты айтып тұрғандай, бұл жарысқа есепке мығым оқушылар қатысты. Олардың жалпы саны 130-ге жуық. Ұлттық ойынымызды меңгерген ұл-қыздар 11 білім ұясының намысын қорғады.
МЕЙРАМБЕК ӨТЕНОВ, жарыстың бас төрешісі:
– Өңірімізде тоғызқұмалақ ойынына қызығатын балалардың саны артуда. 2023-2024 жылдарға қарағанда нәтижелер жақсы. Наурыз айында кіші жасөспірімдер арасындағы облыстық чемпионат өтті. Оған 130-дан астам оқушы қатысты.
Қаз-қатар сап түзеген балалардан ұлттық болмыс сезіледі. Кейбірі жарысқа оюлы киім киіп келіпті. Мұндай ұл-қыздар сайыстың сәнін келтірді. 11 жастағы Алтынай Хусаинова Әлихан Бөкейхан атындағы №25 орта мектебінің намысын қорғайды. “Шеше көрген тон пішер” дегендей, қылықты жеткіншекке тоғызқұмалақ ойнауды анасы үйреткен.
АЛТЫНАЙ ХУСАИНОВА, жарысқа қатысушы:
– Мен 3-ші сыныптан бастап тоғызқұмалақ ойнаймын. Анам үйретті. Жарыстарға қатысып жүрмін.
Бұл сайыс алдағы республикалық додаларға іріктеу болып табылады. Үздік деп танылғандар өңіріміздің атынан өнер көрсетпек.
МЕЙРАМБЕК ӨТЕНОВ, жарыстың бас төрешісі:
– Маусым айында Қостанай қаласында кіші жасөспірімдер арасында ҚР чемпионаты өтеді. Сол жарысқа барамыз.
Бұдан бөлек, Орал, Алматы және Шымкент сынды қалаларда мектеп лигасы өтеді. Жерлестеріміз барлық сайыста бақ сынауды көздеп отыр.
Севара Зияхан