Алина Мұхтарованың мейбукан годзю-рю карете-домен айналысып келе жатқанына 2 жылдай болған. Бұрымды жақында Астана қаласында өткен ел чемпионатына қатысып, бірінші орын иеленді. Алина финалда алматылық қызбен күш сынастырып, ұпай саны бойынша жеңген.
АЛИНА МҰХТАРОВА, мейбукан годзю-рю карате-додан ҚР чемпионы:
– Ел чемпионатына бірінші рет қатыстым. Соның өзінде бірден алтын медаль тағындым. Қарсыласым екеуіміздің күшіміз тең болған секілді. Оны жеңу оңай болған жоқ.
Екатерина Атрепкина дүбірлі додадан бір емес, үш бірдей медальмен келіп отыр. Көк белбеудің иегері 45 келі салмақ дәрежесінде сынға түскен.
ЕКАТЕРИНА АТРЕПКИНА, мейбукан годзю-рю карате-додан ҚР чемпионы:
– Каратемен айналысып жүргенімен небәрі 4 жылдан асса да мақтауға тұрарлық нәтижелер көрсетіп жатырмын. Бойымда каратеге деген қызығушылықты анам оятты. Дәл осы спорт түрін таңдағаныма еш өкінбеймін. Каратемен айналысып жүріп қаншама ел көрдім. Мақсатым – әлемге әйгілі спортшы болу.
Ел чемпионатына Қазақстанның түкпір-түкпірінен 500-ге жуық каратеші қатысқан. Теріскей өңірінің намысын 16 ұл-қыз қорғаған. Жергілікті жастар жалпы есепте 43 медаль жеңіп алды. Оның 19-ы – алтын, 11-і – күміс, 13-і – қола.
ЕВГЕНИЙ МАКСИМОВ, мейбукан годзю-рю карате-до федерациясы СҚОФ президенті:
– Облыста мейбукан годзю-рю карете-домен 200-ден астам жас айналысады. Өкінішке қарай, үлкендер арасында қызығушылық танытқандар саны өте аз. Дені – жастар. Негізі, аталған спорт өңірімізде жақсы дамып жатыр.
Спортшылар енді әлем чемпионатына дайындалады. Жарыс қазан айында алғаш рет Алматы қаласында өтеді. Дүбірлі додада өңір намысын 10 каратеші қорғайды.