Мылтықтың үні өшіп, аспанға бөрік атылған күнге де аз қалды. Алдағы мамырдың 9-шы жұлдызында Ұлы Жеңістің 80 жылдығын атап өтеміз. Атаулы дата қарсаңында облыстық ардагерлер кеңесінің кеңейтілген төралқа отырысы өтті. Жиында мерейтойға дайындық жайы пысықталды. Өкінішке қарай, жыл артқан сайын аймақта майдан көрген жандардың саны азайып барады.
ЕСКЕНДІР ЕЛЕУСІЗОВ, СҚО ардагерлер кеңесінің төрағасы:
– СҚО-да 3 ҰОС ардагері қалды. Тылда еңбек етіп, наградаларға ие болған 36 адам бар. Соның басым көпшілігі қалада тұрады.
Ардагерлер мен отты жылдары аянбай тер төккен жандарға жыл сайын бірреттік төлем жасалады. Биыл оның көлемі айтарлықтай жоғары болады.
ЕСКЕНДІР ЕЛЕУСІЗОВ, СҚО ардагерлер кеңесінің төрағасы:
– Бірреттік төлем бар. Соғыс ардагерлеріне 5 млн теңгеден берілсе, Тыл еңбеккерлеріне 150 мың теңгеден аударылады.
Ардагерлермен және Тыл еңбеккерлерімен шектеліп қалуға болмайды. Мерекеде Ұлы жеңісті жақындатқан өзге де батырларымыздың есімдері аталып, ерліктері жан-жақты паш етілуі тиіс. Кеңейтілген төралқа отырысына қатысушылар осы мәселеге де тоқталды.
ЕСКЕНДІР ЕЛЕУСІЗОВ, СҚО ардагерлер кеңесінің төрағасы:
– Біздің облыстан 55 Кеңес Одағының Батыры мен 11 “Даңқ” орденінің толық иегері шыққан. Соларды ұлықтаймыз. Жастарға айтамыз. Бүгін осы мәселені қараймыз.
Сонымен қатар, кездесуде Айыртау, Аққайың және Мамлют аудандарының тәжірибелері қаралды. Аталған аудандардағы ардагерлер кеңестері ескерткіштерді күтіп-ұстау ісіне және әскери-отаншылдық жұмыстарға баса мән берген.
Байболат Құлтанов