Қазір аққайыңдар өлкесінде су тасқынымен қатар өрт қауіпсіздігі де аса өзекті мәселе болып табылады. Биыл өңірге көктем ерте келді. Осыған байланысты облыста құрғақ шөптің жануы жиіледі. Мәселен, өңірімізде небәрі 7 күннің ішінде ондаған гектар жер отқа оранған.
АСЛАН АХМЕТЖАНОВ, СҚО ТЖД мемлекеттік өрт бақылау басқармасының бастығы:
– Ағымдағы жылдың 25-ші наурызынан бастап өңірде құрғақ шөптің жануының 20 фактісі тіркелді. От жайылған аумақ 78 гектарға жақындап қалған. Тілсіз жау көбінесе Тайынша ауданында бас көтерген. Мұнда 15 жайт анықталды. Сонымен қатар, тізімде Петропавл қаласы, Айыртау, Мағжан Жұмабаев және Жамбыл аудандары бар.
Төтенше жағдайлар қызметкерлерінің қолында былтырғы деректер де бар. Соларға сүйенсек, өткен жылы облыста құрғақ шөптің алғаш жануы сәуірдің 18-і күні орын алыпты. Аслан Ахметов осы фактіні алға тарта келе, биыл оқиға орнына шығулар көбірек болатынын жеткізді. Бұл ретте жалпы сандарға да тоқталайық.
АСЛАН АХМЕТЖАНОВ, СҚО ТЖД мемлекеттік өрт бақылау басқармасының бастығы:
– Жыл басынан бері облыста 122 өрт оқиғасы тіркелді. Былтырғы статистикамен салыстырсақ, 2 пайыздық түсім байқалады. Ал адам шығыны 20 пайызға өсіп отыр. Биыл өңірде тілсіз жаудың салдарынан 12 тұрғын ажал құшты. Оның ішінде 3 бала бар. 15 адам жарақат алды, 1 адам улы газдың кесірінен өмірмен қоштасты.
Үйде немесе далада өрттің бас көтеруіне негізгі себепші – немқұрайлы және жауапсыз адам. Табиғат аясында от жаққан кезде аса мұқият болу керек. Бұл тұрғыда тиісті ереже бар. Алайда, кейбір жандар оған пысқыра қарайды. Былтыр облыста сондай тұлғаларға қатысты 31 әкімшілік хаттама толтырылып, 600 мыңға тарта айыппұл салынған. Брифингіде ауа райына қатысты да болжам айтылды.
ДӘУРЕН ҚОШЫҒҰЛОВ, «Қазгидромет» РММ СҚОФ бөлім басшысы:
– Біздің болжамдарға сәйкес, сәуір мен мамыр айы жылы болады. Қос көрсеткіш те климаттық нормадан асып түспек. Мысал үшін айтсақ, алдағы айда сынап бағанасы 30 градусқа дейін көтеріледі. Сонымен қатар, жиі жел соғады. Жаңбыр да жауады. Оның көлемі норманы құрамақ.
Синоптик жазға қатысты болжаммен де бөлісті. Биыл жайдарлы жаз ыстық болады. Бірнеше күн сынап бағанасы +28+35 градусты көрсетпек.
Байболат Құлтанов