Автокөлік жолдарының жай-күйі – еліміздегі ең өзекті мәселелердің бірі. Сала Мемлекет басшысының жіті бақылауында. Себебі, түрлі деңгейдегі тасжолдар сапалы жасалса, халықтың тұрмыс-тіршілігі жақсаратыны сөзсіз. СҚО-ның жолдар желісінің ұзындығы 8,4 мың шақырымды құрайды. Биыл оның 800-іне жөндеу жұмыстары жүргізілмек. Маңызды жұмыстарға 21 млрд теңге бөлінген. Әрине, бағытталған қыруар қаржы дұрыс игеріліп, жауапты іс сапалы атқарылуы тиіс. Сол мақсатта бүгін облыс орталығында аталған сала мамандарына арналған семинар өтті.
ҚАНАТ БАРҚЫТОВ, СҚО жолаушылар көлігі және автомобиль жолдары басқармасы басшысының орынбасары:
– Биыл облыстық маңызы бар жолдарды жөндеуге 12 млрд теңге бөлінді. Қалған 9 млрд-ы аудандық маңызы бар және елді мекен ішіндегі тас жолдарды қалыпқа келтіруге арналған. Ағымдағы жылы “Петропавл-Жезқазған” автожолындағы маңызды іс аяқталатын болады. Одан қалды, қоғамның қызу талқысына түскен Талшық пен Бидайық арасындағы 67 шақырым жол жөндеу көреді.
Биыл облыста 102 жол жобасын іске асыру жоспарланып отыр. Оның 16-сы – облыстық маңызы бар, 42-сі – аудандық маңызы бар жол. Ал елді мекендердегі көше жолдарын жөндеуге қатысты 44 жоба қолға алынған. Бұл істің бәрі Жол активтері ұлттық сапа орталығы облыстық филиалының жіті бақылауында болады.
ЖОЛДЫБАЙ ТЕНТЕКОВ, “Жол активтері ұлттық сапа орталығы” РМК СҚОФ директоры:
– Биылдан бастап салаға жаңа өзгеріс енді. Енді мердігерлер жолды орталық өкілдерінің тексеріс жүргізіп, оң бағасын бергеннен кейін ғана пайдалануға тапсыра алады. Өткен жылы облыстық маңызы бар 22 жолдан 300-ден астам сынама алынды. Оның 23 пайызы техникалық-нормативтік талаптарға мүлдем сәйкес келмейтінін көрсетті.
Жол активтері ұлттық сапа орталығы облыстық филиалының мамандары өткен жылы аудандық жолдарда 75 тексеру жұмысын ұйымдастырған. 39 учаскеде асфальттің сапасын байқап, 267 сынама алған. Бұл жерлерде арнайы талаптарды бұзуға қатысты 80-нен астам факті анықталыпты. Спикер салаға жауап беретін аудан басшыларына маңызды жұмысты ұдайы бақылауда ұстау керектігін айтты. Семинарға әр ауданнан келген мамандар қатысты. Мәселен, Аққайың ауданындағы маңызды істі қадағалаушы мамандардың сөзінше, өткен жылы аталған аймақта автокөлік жолдарының 18 пайызының жағдайы төмен деп бағаланған екен.
НҰРСҰЛТАН БАЙЗАҚ, Аққайың ауданы әкімінің орынбасары:
– Ауданда жол сапасын жақсартуға арналған бірсыпыра жұмыс атқарылып жатыр. Былтыр ауданда 21 жол жобасы жүзеге асты. Аудан әкімінің тапсырмасымен ауыр жүк көліктеріне арналған жолдарды жөндеуді жоспарлап отырмыз.
Аққайың ауданында биыл автокөлік жолдарының 95 пайызын жоғары деңгейге жеткізу көзделген. Айта кету керек, ағымдағы жылы аталған аймақта 22,7 шақырым жол жөндеу көреді.
Нұрасыл Ахмет