Сергеев су қоймасы – Есіл өзені ағысының негізгі реттеушісі. Өткен жылдан бастап мұнда гидроторапты нығайту, тереңдету және жағалауларды эрозиядан қорғау жұмыстары жүргізіліп жатыр. Қазіргі уақытта жалынан асып төгілу деңгейінің биіктігі – 1 метр 4 сантиметр. Айта кету керек, өткен жылғы антирекорд 4 метр 25 сантиметр болған. Қазір өңірімізде су тасқынының екінші толқыны басталды. Ол Ақмола облысынан келеді.
ҚЫМБАТ МЕРҒАЛИМОВА, “Қазгидромет” РМК СҚОФ директоры:
– Бүгінгі таңда Ақмола облысынан келе бастаған ағыннан Есіл өзені деңгейінің қайта көтерілуі байқалады. Мұны Ғ.Мүсірепов пен Шал ақын аудандары аумағында тіркедік. Бір тәулікте су қоймасынын толуы 118 пайызға жетті. Ағын әлі келіп жатыр.
Әзірге, өңіріміздегі жағдай тұрақты. Сергеев және Петропавл су тораптары штаттық режимде жұмыс істеп тұр. Тасқын басталғалы олар арқылы 620 млн текше метр су ағып өтті.
ШҰҒАЙЫП ИБАТУЛЛИН, “Қазсушар” РМК СҚОФ директоры:
– Жағдай бақылауда. Жергілікті атқарушы органдарға ақпаратты әр 4 сағат сайын береміз. Су тасқынының екінші толқыны нөпірі қатты болмайды деп ойлаймыз. Өткен жылғы жағдай қайталанбауы керек.
Қанат Бозымбаев жауапты тұлғаларға тәуекел аймағындағы елді мекендер мен саяжай аумақтарындағы ахуал тәулік бойы бақылауда болуы керектігін міндеттеді. Су қоймаларындағы ағыс деңгейін реттеу, сондай-ақ, тасқынға қарсы атқарылып жатқан іс-шаралар туралы ақпараттардан халық үнемі хабардар болып отырулары қажет. Жалпы, облыс бойынша тәуекел аймағында 116 елді мекен бар.
Өткен жылғы жағдай қайталанбас үшін су тасқынының алдын алуда инженерлік жұмыстар жоспары жүзеге асырылып, нәтижесінде 60 елді мекенде су басу қаупі азайды. Ұзындығы 47 шақырымды құрайтын бөгеттер бой көтеріп нығайтылды. 108 су өткізу құбыры орнатылып, 10 шақырымнан астам арықтар тереңдетілді. 4 шақырым кіші өзен арнасы мен 200 шақырым кәріз жүйесі тазартылды.
“Қызылжар” телеарнасы