Петропавлда Аутизм мәселесі туралы ақпарат тарату күніне орай жиын өтті. Маңызды шараға түрлі оңалту орталықтарының мамандары, білім беру мекемелерінің қызметкерлері және дәрігерлер қатысты. Бұл психологиялық ауру бірден байқалмайды, бала 2 жастан асқанда ғана білінеді. Оны қалай анықтай аламыз? Бойында дерті бар бүлдіршін өз-өзімен ғана ойнайды. Тіпті, анасын да керек қылмайды екен. Егер де біреу қолына алса, бірден жылайды. Аутизмді ерте анықтау аса маңызды. “Қазақилыққа салынып, жүре берген дұрыс емес”,- дейді мамандар.
ЛАРИСА БАТЫРЕВА, дәрігер-психиатр:
– Қазіргі таңда елімізде туған әрбір 100-ші бала аутизмге шалдыққан. Қазақстанда психологиялық дертпен ауыратын 12 мыңнан астам жеткіншек бар. Осыдан 5 жыл бұрын бұл көрсеткіш 4 мыңды құраған еді. Бас шайқатарлық статистика. Шынын айтқанда, дамуы кенжелеген балаларға облыста тиісті көмек толық көрсетілмейді. Алатын жәрдемақылары да аз. Ештеңеге жетпейді деп айта аламыз. Сондықтан, бүгін осы жерге жиналып, маңызды мәселені шешу жолдарын талқылаудамыз.
Енді облысымыздағы статистикаға тоқталсақ. Өңірде 800-ге жуық бала аутизммен ауырады. Мамандармен тілдесу барысында соңғы жылдары психологиялық ауруға шалдыққан балалардың саны неге көбейіп бара жатқанын сұрадық. Спикердің сөзінше, медицина дамымаған шақта науқас балаларды анықтау қиынға соққан. Қызмет көрсету орталығының басшысы Назгүл Тортулованың сөзінше, аутизм генетикалық жолмен де беріледі.
НАЗГҮЛ ТОРТУЛОВА, балаларға қызмет көрсету орталығының басшысы:
– Аутизм емделмейді. Психологиялық ауруға шалдыққан балалар тұйық келеді. Бірақ, оларды ерте жасынан орталыққа әкелсе, біз оны қоғамға бейімдей аламыз. Ерекше балалар жұрт қатарлы мектепке баруға құқылы.
Облыста ерекше балаларға арналған 22 арнайы кабинет жұмыс істейді. Жиынға қатысушылар олардың санын 2 есеге көбейту керектігін айтты. Аутизмге шалдыққан балаларға мемлекет тарапынан ұдайы қолдау көрсетілу керектігін де жеткізді.
Нұрасыл Ахмет