Премьер-министрдің орынбасары Қанат Бозымбаевтың жұмыс сапары Қызылжар ауданында жалғасты. Ол Прибрежное ауылының іргесіндегі бөгеттің салынуымен, сапасымен танысты. Қорғаныс үйіндісі биыл көтерілді, мықтап нығайтылды. Қабырғасына полиэтилен қаптама төселді, бетон плиталар мен топырақ салынған қаптар қойылды. Атқарылған шаруаның барлығын аудан басшысы Сақтаған Сәдуақасов айтып берді.
Өткен жылы Қызылжар ауданы ауыз толтырып айтарлықтай зардап шекті. “Биыл екі аяқ бір етікке тығылмас үшін маңызды жұмыстар атқарылды”, – дейді Сақтаған Сәдуақасов.
Ал Заречный кентінде Петропавл қаласының әкімі тасқыннан қорғану бойынша қандай жұмыстар атқарылғанын айтып, елді мекенге қатысты жоспарларымен бөлісті. Жақында ауданда 4,3 шақырым айналма канал салынды. Жобаның құны 328 миллион теңгені құрады. Қазіргі уақытта арна жұмыс істеп, судың бір бөлігін өзіне тартып жатыр. Осыған байланысты әзірге саяжайларды су басу тіркелмеген.
Танысу барысында аймақтағы ахуалды «Қазгидромет» облыстық филиалының директоры Қымбат Мерғалымова айтып өтті.
Қанат Бозымбаев қазіргі уақытта тасқын басу қаупі жоқ екенін және өңір өзендеріндегі судың деңгейі күрделі еместігін атап өтті.
Айта кетейік, Заречный кентіндегі саяжай аумағында 6 үй орналасқан. Су тасқыны болуына байланысты барлық тұрғындар қауіпсіз жерге көшірілді.
Байболат Құлтанов