Жергілікті университет қабырғасында «Адалдық сағаты» ұйымдастырылды. Жиынға Сыбайлас жемқорлыққа қарсы іс-қимыл агенттігі СҚО бойынша департаменті басшысының бірінші орынбасары Алмат Мырзалиев қатысты. Оқу ордасында қоғам дертінің алдын алуға бағытталған түрлі бастамалар қолға алынуда. Мысалы, қазір білім алушы емтиханға QR-кодты сканерлеу арқылы ғана кіреді. Яғни, сынақ залына бұрынғыдай студенттік билетпен өтпейді. Бұл – сұрақтарға өзге адам жауап бердейді деген сөз.
ИННА ДЖЕМАЛЕДИНОВА, М.Қозыбаев атындағы СҚУ сыбайлас жемқорлыққа қарсы комплаенс-қызметінің басшысы:
– Соңғы енгізілген жаңашылдықтың тағы бірі – жатақханаға онлайн форматта тіркелу және орналасу. Бұл жерде іске адам араласпайды. Яғни, білім алушы ашық әрі әділ түрде студенттер үйінен орын алады. Тіпті оның бөлме мен кереуетті таңдауға мүмкіндігі бар. Бұл – біздің университет ойлап тапқан жоба. Қолданысқа былтыр енгізілді.
Мұнымен тоқтап қалуға болмайды. Жаңа жобалар әлі де жүзеге асады, қолданысқа енгізіледі. Бұл – заманауи мүмкіндіктерге байланысты қолға алынып жатқан жұмыс. Осы орайда адамның бойында сыбайлас жемқорлыққа қарсы мәдениетті қалыптастыру жайын ұмытпау қажет. Алмат Мырзалиев басты мәселе осы екенін атап өтті.
АЛМАТ МЫРЗАЛИЕВ, ҚР Сыбайлас жемқорлыққа қарсы іс-қимыл агенттігі СҚО бойынша департаменті басшысының бірінші орынбасары:
– Жемқорлыққа қарсы тұру үшін сіздер не істей аласыздар? Осы сұраққа жауап берейік. Біріншіден, құқықтар мен міндеттер туралы хабардар болу керек. Екіншіден, сіз әрқашан өзіңіздің ісіңізге адал әрі әдепті болу қажет.
Ал егер заңның ала жібінен аттаса, міндетті түрде жаза арқалайды. Яғни, өзінің болашағына балта шабады, ата-анасын уайымға батырады.
АЛМАТ МЫРЗАЛИЕВ, ҚР Сыбайлас жемқорлыққа қарсы іс-қимыл агенттігі СҚО бойынша департаменті басшысының бірінші орынбасары:
– Сыбайлас жемқорлықпен күрес сіздердің де міндеттеріңіз болуы қажет. Бауыржан Момышұлы бабамыз «Тәртіпсіз ел болмайды, тәртіпке бағынған құл болмайды» деп бекер айтпаған.
Мінберден айтылғанды көпшілік ұйып тыңдады. Аса құлақ салмағандар да болды. Олар телефонмен уақыт өткізді. Дәулетбек Шаяхметов әскерден оралыпты. Былтыр студент атанған жас болашақта жемқорлықты жойсам дейді.
ДӘУЛЕТБЕК ШАЯХМЕТОВ, студент:
– Заңгер мамандығына оқимын. Оқуға былтыр түстім. Университет қабырғасында сыбайлас жемқорлық жайлы айтылады. Өзім болашақта прокурор болып, сыбайлас жемқорлықтың алдын алсам деймін.
Сыбайлас жемқорлыққа қарсы департамент волонтерлік ұйымдармен байланыс орнатқан. Бүгінде 130-тан астам ерікті бармақ басты, көз қыстылықтың алдын алуға күш салып жүр.
Байболат Құлтанов