Бұл – Ахрименко көшесі, 4 мекенжайындағы үйдің ауласы. Қазір мұнда коммуналдық кәсіпорын қызметкерлері ағаштардың бей-берекет жайылып кеткен бұтақтарын аралап жатыр. Табиғат көркі – жасыл желек күтім көрмесе, адам баласына кедергі келтіріп, қауіп төндіруі мүмкін. Әбден биіктеп кеткен бұтақтар электр желісіне барып тіреледі, ауыры кенет адам басына құлап кетуі ықтимал.
Келеңсіз жайттың алдын алуға болады. Шешім – бұтақты аралап, ағашты жөнге келтіру.
СЕРГЕЙ ЛАЗОРЕНКО, “Ахрименко 4” МИБ төрағасы:
– Ағаштардың жайылып кеткені соншалық, желмен бірге шайқалып, терезені ұрады. Теңселіп, құлар алдында тұрған ағаш өскіндері тұрғындардың әбден мазасын қашырды. Абаттандыру шарасын жүргізбес бұрын істің дұрыстығын тұрғындармен ақылдасып, келісімін алдық.
Ағашты артық бұтақтарынан арылтудың жасыл желектің өзіне ешқандай зияны жоқ дейді дендролог Тимур Зверяченко. Білікті маманның айтуынша бұл шара ескі ағашты тәртіпке келтіріп, жаңасының түзу өсуіне ықпал етеді.
ТИМУР ЗВЕРЯЧЕНКО, дендролог, М.Қозыбаев атындағы СҚУ доценті:
– Бұндай шараларды негізінен көктем кезінде жүргізген дұрыс. Жаяу жүргіншілерге кедергі келтірмес үшін ағаштың төменгі жағынан биікке қарай – 3 метрге, көліктердің өтуіне ыңғайлы болуы үшін 5 метрге дейін аршуға болады. Қазір осындай шараны жүргізуге тура келіп отырса, алдағы уақытта дұрыс егілген көшеттердің өсуін реттеу мақсатында шамалы қырқу жұмыстары жыл сайын атқарылып отырады.
Негізі, облыс орталығында бей-берекет өсіп кеткен ағаштар көп. ТҮКШ бөлімінің мамандары дендрологтармен бірге 10 мыңнан астам жасыл желектің апатты жағдайда екенін анықтаған.
Мәдина Қаби