Үкілі Ыбырай, Шәмші Қалдаяқов, Жұбан Молдағалиев, Нұрғиса Тілендиев. Жіпке тізілгеннің әрқайсысы жайлы сағаттап айтып, шығармаларын тәуліктеп тыңдауға болады. Жастар қазақ музыкасына үлес қосқан композиторларды біле ме? Петропавлдағы “Sana” әдеби-музыкалық клубы қазіргі таңда осы түйткіл төңірегінде жұмыс жүргізіп жатыр. Құрылғанына биыл 5 жыл болған ұйым мүшелері ұлы өнерімізді, атақты азаматтарды ұмыт қалдырмау үшін еңбек етуде.
БОТАГӨЗ ҚОЖАБЕКОВА, “Sana” әдеби-музыкалық клубының мүшесі:
– Біздің мақсатымыз – жастарға, өзімізден кейінгі ұрпаққа елдің киелі жерлерін таныстыру, атақты ақындармен қоса өзіміздің жергілікті ақын-жазушылардың өмірі мен шығармашылығын таныстыру. Одан бөлек, елімізде болып жатқан барлық шараларға белсенді қатысу.
Жиын құрылтай форматында өтті. Басты мәселе көтерілді, аға буын өкілдері ақыл-кеңестерін ортаға салды. Қазақтың ұлы өнері өшпейді, халыққа кеңінен танылған тұлғалар да ұмыт қалмайды. Себебі, біздің арамызда олардың жолын жалғаған Жанат Айтбаев, Дәмеш Құрманкина сынды өнер өкілдері бар. Теріскейлік талант талай жастың томағасын сыпырды, әлі де жастарға бағыт-бағдар беріп келеді.
ДӘМЕШ ҚҰРМАНКИНА, Ақан сері атындағы облыстық филармонияның әртісі, ҚР Мәдениет саласының үздігі:
– Біздің облыстық филармонияның міндеті – халықтың алдына шығып, оларға концерт ұсыну. Өнер көрсетуді жалғастырамыз.
Қазақтың өнері мен мәдениеті – баға жетпес білім. Жиынға қатысушылар айтылғанның барлығын жастар көңілге тоқыса дейді. Кездесу барысында жиналғандар ән де шырқады.
Мәдина Қаби