1-ші сәуір – Халықаралық құстар күні. Осыған орай облыстық балалар мен жасөспірімдер шығармашылығы орталығында “Құстар әлемі” атты облыстық байқау өтті. Оған аймақтың түкпір-түкпірінен 100-ге жуық талантты ұл-қыз қатысты. Қожаберген жырау атындағы 6-шы орта мектебінің 5-сынып оқушысы Наргиза Марат қазылар алқасына “Қос аққу” атты туындысын ұсынды. Бұрымды жас Қызыл кітапқа енген, айдын көлдің еркесі аққудың мүсінін изолон деп аталатын дүниеден жасапты.
НАРГИЗА МАРАТ, байқауға қатысушы:
– Туындыны жасамай тұрып сызып дайындап алдым. Кейін изолон материалынан қауырсындарын жасадым. Ыстық жел арқылы қауырсындарын бір-біріне жабыстырдым.
Байқау 6 номинация бойынша өтіп жатыр. Олар: ән айту, би билеу, музыкалық аспапта ойнау, мәнерлеп оқу, құстардың үйшігін жасау, сәндік-қолданбалы және бейнелеу өнері.
ЛЮБОВЬ ФОМИЧ, облыстық балалар мен жасөспірімдер шығармашылығы орталығының әдіскері:
– Оқушылардың өнерін, дайындаған туындыларын арнайы тағайындалған қазылар алқасы бағалайды. Қандай номинация болмасын ең басты талап – барлығы құстар жайында болуы қажет. Біз мұндай экобайқауды алғаш рет өткізіп отырмыз.
Шараны ұйымдастырушылар осындай байқаулар өткізу арқылы жастардың бойында табиғатқа деген қамқорлық түсінігін қалыптастырғысы келеді.
Мәдина Қаби