Думандатып ортаға шыққан мына жандарға жауапты міндет жүктеліп отыр. Олар арнайы автобуспен Қазақстанның оңтүстік өңірлерін бетке алады. Қозыбаев университетінің оқытушылары, студенттер мен волонтёр 6 мың шақырымды артқа тастап, 30 елді мекенде болмақ. Басты мақсат – оқушылармен кездесу және “Серпін” бағдарламасы бойынша Петропавлға оқуға түсуге шақыру.
ӘДІЛХАН ТӨЛЕПБЕРГЕН, М.Қозыбаев атындағы СҚУ әлеуметтік-мәдени даму жөніндегі басқарма мүшесі:
– Бұл өте ауқымды шара деп білеміз. “Серпін” бағдарламасы бар. Оның аясында биыл 200-ге жуық квота қарастырып отырмыз.
Қозыбаев университеті күнгейдегі жастарды қарсы алуға дайын. Жалынды қыз-жігіттерге арнайы топ толық ақпарат бермек.
БАЙЖАН ӘБДІРОВ, М.Қозыбаев атындағы СҚУ студенті:
– Петропавл қаласы маған бұрыннан ұнайды. Ұнағандықтан осында оқуға түстім.
Сырдария жағасында ер жеткен Байжан Әбдіров Петропавлды, университетті ерекше жақсы көреді. Ол теріскейге жерлестерін көптеп тартқысы келеді.
БАЙЖАН ӘБДІРОВ, М.Қозыбаев атындағы СҚУ студенті:
– Қызылорда облысының тумасымын. Қазіргі таңда осы Қозыбаев университетінде қазақ тілі және әдебиеті мамандығы бойынша оқимын. 4 қалаға барамыз. Жастарды керемет қалаға, керемет университетке шақырамыз!
Қазір жергілікті білім ордасында “Серпін” бағдарламасы бойынша 167 студент оқып жатыр. Биыл 65 түлек диплом алады. Арнайы жоба арқылы Петропавлды таңдаған жастарға 2-ші және 3-ші курста жұмыс ұсынылады, бұл тұрғыда бірнеше кәсіпорынмен келісім жасалған.
Байболат Құлтанов