М.Жұмабаев ауданындағы “СК АГРО 2050” серіктестігінің құрылғанына небәрі 10 жыл ғана болды. Агроқұрылым аз уақыттың ішінде қарыштап дамып, ауданның іргелі шаруашылықтарының біріне айналған. Биыл аталған серіктестік 50 мың гектар аумаққа дән сіңірмек. Мұнда көктемгі егіс жұмыстарына дайындық қызу жүріп жатыр. Еңбеккерлер қазір техникаларын қамдауда.
ӘЛІБЕК ҚОЖАБЕК, “СК АГРО 2050” ЖШС бригадирі, М.Жұмабаев ауданы:
– Қазіргі таңда трактор, комбайндарды жөндеп жатырмыз. Қажетті құрал-саймандарды уақытылы алдық. Сәуір айының ортасына қарай ылғал жабу жұмыстарына кірісеміз. Ал егіс науқанын мамыр айының басында бастамақпыз. Былтыр мол өнім алдық. Биыл ауа райы жақсы болса, өткен жылғы көрсеткіштен асып түскіміз келеді.
Егіс пен орақ науқанын ұйымдастырылған түрде өткізу үшін тегеурінді техника ауадай қажет. Өткен аптада өңір аграрилерінің басын қосқан семинар-кеңесте облыс әкімінің бірінші орынбасары Марат Тасмағанбетов ескі комбайн, тракторлардың кесірінен бәсекеге қабілетсіз болып қалуымыз мүмкін деп баса айтқан болатын. “СК АГРО 2050” серіктестігінде машина-трактор паркін жаңарту жұмыстары қарқынды жүріп жатыр. Агроқұрылым биыл 3 қуатты техника алыпты. Ағымдағы жылы М.Жұмабаев ауданында 438 мың гектар аумаққа дән сіңірілмек. Оның 70 пайызы дәнді және дәнді бұршақты дақылдарға арналған. Маңызды науқанға 1168 трактор және 89 заманауи кешен жұмылдырылады. Сондай-ақ, аудан аграрилері 33 мың тонна минералды тыңайтқыш себуді жоспарлап отыр.
Нұрасыл Ахмет