Су тасқыны – қазіргі күн тәртібінде тұрған бірінші мәселе. Бүгінде синоптиктер тәулік бойы бақылау жүргізуде. Ұсынылған тың ақпаратқа сүйенсек, Сергеев қоймасындағы көрсеткіш 90 см құрайды. Осы деректі алға тарта келе Шал ақын ауданының аумағынан алғашқы толқын өтті деуге болады.
НАТАЛИЯ ЛЕВИНА, «Қазгидромет» РМК СҚОФ директорының орынбасары:
– 12:00-дегі жағдай бойынша Есіл ауданындағы Покровка ауылы маңында су деңгейінің көтерілуі байқалады. Біздің гидрологиялық бекеттегі көрсеткіш 868 см құрады. Әзірге алаңдауға себеп жоқ. Сонымен қатар, алғашқы толқын Петропавл қаласына да таяп қалды. Біздің есептеулерге сүйенсек, облыс орталығының маңында судың шектік деңгейі сәуірдің 5-6 күндері тіркелмек.
БАЙБОЛАТ БЕКТЕМІРҰЛЫ, тілші:
– Синоптиктердің сөзінше, тасқынның алғашқы толқыны қауіп төндірмейді. Бізді алаңдатып отырғаны – Ақмола облысынан келетін су. Яғни, екінші толқын күндіз күлкіден, түнде ұйқыдан айырды десек артық емес. Бүгін Қазгидромет мамандары маңызды мәліметпен бөлісті. Іргедегі өңірден су Солтүстік Қазақстан облысының аумағына жетіп үлгерді.
Демек, солтүстікқазақстандықтар үшін аса жауапты кезең басталды. Жақын арада Есіл өзені көтеріледі, Сергеев қоймасының ернеуінен асатын судың деңгейі қайтадан өзгереді.
НАТАЛИЯ ЛЕВИНА, «Қазгидромет» РМК СҚОФ директорының орынбасары:
– Ақмола облысынан судың келуіне байланысты Ғабит Мүсірепов ауданында деңгейдің көтерілгендігін байқаймыз. Есіл өзенінің Шөптікөл ауылының тұсындағы деңгейі 804 см құрады. Мұндағы өсім – 31 см. Көп ұзамай Сергеев қоймасындағы көрсеткіш қайта артпақ. Әзірге екінші толқын көлемін жобалай алмағандықтан нақты сандармен бөлісе алмаймыз.
Есілге Ақмола облысындағы Жабай мен Қалқұтан өзендері құяды. Негізгілер – осы екеуі. Қазір синоптиктер көрші аймақтағы жағдайды қалтқысыз бақылауда. Күрт өзгерген ауа райы да жағдайды қиындатуы мүмкін. Сәуірдің алғашқы онкүндігі құбылмалы болады деген болжам бар.
– Сәуірдегі орташа ауа температурасы +5,9+7,3 градустың маңында болады. Бұл нормадан 1 градусқа жоғары. Айдың алғашқы онкүндігінде сынып бағанасы жиі өзгереді. Кей күндері түндегі көрсеткіш минис 3-ке дейін түседі. Өңірдің басым бөлігінде жаңбыр жауады. Оның да көлемі нормадан асып түспек.
Сонымен қатар, жиі жел соғады. Желдің күштілігі секундына 15-20 метрді құрамақ.
Байболат Құлтанов