Демалыс күндері Петропавлда “Домбыра-дастан” атты республикалық күй тартыс байқауы өтті. Сайысқа еліміздің 6 облысынан келген 24 жас қатысты. Дәстүрлі дода білім беру саласының үздігі, аталған жобаның негізін қалаушы Серікбай Здуалиевті еске алуға арналды.
ТҰҢҒЫШ БЕКЕНАЙҰЛЫ, “Домбыра – дастан” күй тартыс жобасының жетекшісі:
– Байқау оқушылар арасында және студенттер арасында өтеді. Бас жүлдеге ие болған жастар 50 мың теңгеге ие болады. Қатысушылардың өнерін бағалау барысында орындаушылық шеберлікке, техникаға, сахна мәдениетіне, дыбыстың тазалығына баса назар аударамыз.
Сайыстың өзіндік ерекшелігі бар. Сахнаға шыққан екі домбырашы 10 күйді кезектесіп ойнайды. Ең қызығы, күйшілердің бірі туындының кез келген жерінде тоқтайды. Мұны қарсылас бақылап отыруы қажет. Ол шығарманы сол жерден жалғастырып алып кетуі керек.
Сайысты мүсіреповтік Мансұр Жантас пен ақжарлық Айша Аманжол бастады. Екеуі де республикалық деңгейдегі байқауға алғаш рет қатысып отыр. Домбыраның құлағында ойнайтын жеткіншектер көпшілікті сүйсіндірді. Болашақта қос талант та елімізге танымал өнер иелері атанары сөзсіз.
АЙША АМАНЖОЛ, байқауға қатысушы, Ақжар ауданы:
– Сайыста Құрманғазы, Дәулеткерей, Сүгір аталарымыздың күйлерін тарттым. Қобалжығанымды жасырмаймын. Соған қарамастан жақсы өнер көрсеттім деп ойлаймын.
«Құлақтан кіріп, бойды алар, әсем ән мен тәтті күй» деп бекерден-бекер айтылмаған. Байқау барысында шертілген әр туынды бойды тітіркендірді, рухты жаныды. Өз кезегінде көрермен аламанға түскен жастарға қошеметпен, қиқумен шабыт берді.
Қызылжарға алыстан ат терлетіп келген күйшілер де осал емес. Тараздық өнерпаздар бас жүлдеден үмітті.
БАҚКЕЛДІ ЖАНАБЕК, байқауға қатысушы, Тараз қаласы:
– 100-ден астам күй білемін. Өнерде жүргеніме 7 жыл болды.
Мектепаралық сайыстың қорытындысы бойынша бас жүлдені мүсіреповтік Талғат Ермек иеленді. Ал студенттер арасындағы бәсекеде астаналық Ералы Таупихтің мерейі үстем болды. Күй тартыс – өткеніміз бен өнеріміз ұлықталатын дода. Байқаудың тәрбиелік тұрғыда да маңызы зор. Болашақта мұндай шаралар атақты тұлғалар өмірге келген теріскейде жиі ұйымдастырылмақ.
Нұрасыл Ахмет