Солтүстікқазақстандық палуан кезекті мәрте сарықұрлықтың үздігі атанды! Еркін күрес шебері Нұрқожа Қайпанов Иорданияда өткен Азия біріншілігінде алтыннан алқа тағынды. Осылайша, Алаш жұртының сенімін ақтаған жерлесіміз Азияның үш дүркін чемпионы деген атаққа ие болды. Білекті жігіт ақтық сында Қырғыз елінің үкілеген үмітін жеңді. Теріскейлік толағайды жарқын жеңісімен аймақ басшысы Ғауез Нұрмұхамбетов құттықтады.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
– Нұрқожа 74 кг дейінгі олимпиадалық салмаққа ауысып, өзін жақсы қырынан көрсетуде. Алдағы уақытта жоспарлары орындалып, олимпиада ойындарына қатысып, еліміздің намысын қорғауға жазсын. Нұрқожа мен бапкерлерін, спортсүйер қауымды алтын жүлдемен құттықтаймын. Жеңісті күндер алда болсын!
НҰРҚОЖА ҚАЙПАНОВ, еркін күрестен үш дүркін Азия чемпионы:
– Бұл менің Әлем чемпионатынан кейінгі алғашқы ірі жарысым. Өте қиынға түсті.
Байболат Құлтанов