“Таза Қазақстан” акциясы аясында сенбілік Мағжан Жұмабаев ауданында да өтті. Аудан әкімі Рахат Смағұлов бастаған мағжандықтар шараға біркісідей атсалысты. “Тазалық – ортақ міндет!” ұранымен басқосқан жерлестеріміз Булаево қаласының түкпір-түкпірін күл-қоқыстан арылтпақ.
ТӨЛЕГЕН ӘБІЛМӘЖІНОВ, “Amanat” партиясы Мағжан Жұмабаев аудандық филиалының төрағасы:
– Біз бұл жұмыстарды қаламыз таза болсын деген оймен жүзеге асырып жатырмыз. Әрбір отбасының ауласы таза болса, көшеміз де, еліміз де таза болады.
Ауыр техника ескі нысанның орнын ретке келтіріп жатыр. Болашақта бұл жерде балалар үшін ойын алаңы салынуы мүмкін. Жоба жүзеге асса, ұл-қыздар асыр салады, көшенің сәні кіреді. Ал мына жақта қоқыс жиналуда. Тұрғындардың қолында қап бар. Олар өздеріне белгіленген аумақтарды аралай жүріп, шашылғанның барлығын теріп алды.
МЕЙРАМГҮЛ ӘБІШЕВА, аудан орталығының тұрғыны:
– Сенбілікке қатысу – әрбір азаматтың парызы. Еліміздің экологиясы таза болу керек. Бұл денсаулығымыз үшін маңызды. Біз жолдасым екеуміз қатысып жатырмыз.
Алғашқы тазалық шарасына 500-ден астам жұмабаевтық тұрғын қатысты. Жерлестеріміз мұнымен шектеліп қалмайды. Олар алдағы уақытта да сенбіліктер мен бейсенбіліктер ұйымдастырып, қала сыртына қоқыс шығаруды жалғастырмақ.
Севара Зияхан