Булаево қаласында қазақ күресінен Батыр Баян атындағы турнир өтті. Бұл – жыл сайын ұйымдастырылатын облыстық жарыс. Биыл деңгейі өскендігі байқалады. Бірсыпыра жас палуан келген.
АМАНГЕЛДІ БӘКІРОВ, қазақ күресінен жаттықтырушы:
– Жарысымыз өте жоғары деңгейде өтіп жатыр. Петропавл қаласынан және облыстың 9 ауданынан жас палуандар келді. Турнирге бірінші жылы 130-дан астам, екінші жылы 150-ден астам бала қатысса, биыл 220-ға жуық спортшы қатысуда.
Жасөспірімдер мен кіші жасөспірімдер санатындағы палуандар әртүрлі салмақ дәрежесі бойынша күресті. 55 келі салмақта бағын сынап, финалға шыққандардың бірі – Айдар Даниял. 11 жастағы жеткіншек Мағжан Жұмабаев ауданының намысын қорғады.
АЙДАР ДАНИЯЛ, турнирге қатысушы, М.Жұмабаев ауданы:
– Жартылай кезеңде жеңіске жеттім. Қарсыластарым мықты болды, бірақ жақсы күрестім. Екінші қарсыласыммен күрескен кезде белдесуге дейін жеттік.
Жас спортшыларды қолдап келгендер де аз болмады. Спортсүйер қауым балаларға қолдау көрсетті. Турнир соңында мықтылығымен танылған спортшылар медаль, кубок және жеңімпаз белдіктерімен марапатталды.
Севара Зияхан