“Роботтар триатлоны”. Петропавлдағы Назарбаев Зияткерлік мектебінің 10 жылдығына орай құлтемірлердің жарысы өтті. Роботтарды балалардың өздері құрастырған. Сайысқа барлығы – 40-қа жуық жас өнертапқыш қатысты. Олар – 5-ші-6-шы сыныпта оқитын жеткіншектер. Арнайы бағдарлама жүктелген роботтардың күштері “Арқан тартыс”, “Сумо”және “Пошташы” сайыстарында сыналды.
СӘЛІМКЕРЕЙ ЕЛМУРАД, №1 Новоишим орта мектебінің оқушысы, Ғ.Мүсірепов ауданы:
– Маған роботехника пәні ұнайды. Себебі, робот жасаған өте қызық. Мектебімізде робот жасау үшін барлық құрылғылар, арнайы кәбинеттер бар. Бізге робот жасауды Шоқан мұғалім үйретеді. Сонымен қатар, ол бізге информатика пәнінен сабақ береді. Біздің алдағы мақсатымыз – осы жарыста жеңіп, Астана қаласына барып жүлделі орын алу.
Шара барысында информатика пәні мұғалімдеріне арналған шеберлік сағаты ұйымдастырылды. Педагогтар робототехника бойынша өзара тәжірибе алмасты.
ӘДІЛБЕК ИСМАГУЛОВ, Химия-биология бағытындағы НЗМ информатика пәні мұғалімі:
– Негізгі мақсатымыз – облыстағы робототехниканы дамыту, балаларға қызықты жарыстар ұйымдастыру. Жарысты үш түрлі категория бойынша ұйымдастырып жатырмыз. Қатысушылар – 7-ші сыныптан төменгі оқушылар. Назарбаев Зияткерлік мектептерінен басқа барлық мектептер қатыса алады. Үш категорияның ішінен ұпайларды қосып, негізгі мықты команданы анықтап шығамыз.
Жарыс қорытындысы бойынша Новоишим орта мектебінің балаларынан құралған “Роботриумф” командасы бірінші орын иеленді. “ЛОРД” мектеп-лицейінің оқушылары 2-ші орынды еншілесе, үздік үштікті 7-ші орта мектебінің жеткіншектері тұйықтады.
Севара Зияханова