Жастарды экомәдениетке баулу жергілікті жоғары оқу орнында бастау алды.
Мұнда әр корпуста, әр қабатта мынадай жәшіктер қойылды. Төрт жәшіктің жеке қызметі бар. Үшеуіне пластик дүние салынса, қалған біреуіне пластамассадан өзгесі салынады. Идея – университет мамандарыныкі, қолдаушы – “Радуга” серіктестігі мен “Amanat” партиясының “Болашақ” филиалы.
ӘСЕЛ БЕКТЕМІРОВА, М.Қозыбаев атындағы СҚУ география және экология кафедрасының аға оқытушысы:
– Бірінші мақсат – қоқысты жинау, реттеу. Сонымен қатар, тапсырылған бөтелкелердің арқасында олар бізге кішігірім ақша береді.
Қозыбаев университеті мен “Радуга” компаниясының арасында өткен жылы әріптестік жайында меморандумға қол қойылған екен. Сол уақыттан бері білім ордасында қоқыс тастайтын жәшік саны көбейген. Елнұр Дәуренбек – болашақ эколог. Оның айтуынша, бұл бастаманың жастарды экомәдениетке баулуда септігі зор.
ЕЛНҰР ДӘУРЕНБЕК, М.Қозыбаев атындағы СҚУ студенті:
– Мысалы, әрбір университеттің корпусында тамақ сататын дүкен бар. Жастар одан тауар алғаннан кейін қалдығын қоқыс жәшігіне тастайды. Ал олар кейін жай төгіліп, еш пайдаға асырылмайды. Ал мына контейнерге салатын болса, одан бір дүние ойлап шығаруға болады.
Университетте жұмыс істейтін маман мен оқитын студент санының көптігін ескерсек, бұл жәшіктер лезде толып қалады. Төрт жәшікке бір сағаттың ішінде 11 келіден астам қоқыс жиналып қалды. Қайта кәдеге жаратуға болатын дүниені радугалықтар бірден кәсіпорынға алып кетті.
Мәдина Қаби