Өңір тұрғындарының бірі “Табиғат – зор байлық” деген түсінік қалыптастырса, ал екіншісі қарама-қарсы пікір ұстанатын сыңайлы. Жасыл желегі жайқалып, суы мөлдіріген аққайыңдар өлкесінде қоршаған ортаны ластау жалғасып жатыр. Арамыздағы кейбір жандар әлі де қалаған жеріне апарып, қоқыс төгеді. Бұл – зор қауіп. Бірталай жылда жойылатын қалдықтардан сіз бен біз жұтатын ауаға зиянды заттар тарайды әрі шашылған дүние көзге оттай басылып, еңсені түсіреді. Былтыр аймақта «Қазақстан Ғарыш Сапары» Ұлттық Компаниясы» АҚ арқылы қоқыс тасталған 116 заңсыз орын анықталыпты. Бүгінгі күні оның 106-сы жойылған. Сонымен қатар, облыста мобильді топтар да жұмыс істеген.
ТАЛҒАТ СӘБИЕВ, СҚО бойынша экология департаментінің басшысы:
– Мобильді жұмыс тобы Петропавл қаласы бойынша және Қызылжар, Жамбыл, Мамлют, Есіл, Аққайың, Айыртау аудандарына барып, 100 заңсыз орын анықтады. Бүгінгі күні 93 орын жойылды.
Өкінішке қарай, облыста қалдықтар төгілетін полигон тапшы. Соңғы есептеулерге сүйенсек, өңірде 9 алаң тұрғызу керек. Егер оң бастама сәтті жүзеге асса, аймақта қайта өңдеу саласы да алға басады. Яғни, қажетсіз деп жәшікке тасталған қоқыстан жарамды дүние жасалады. Дамыған елдерде бұл тәжірибе бұрыннан бар. Брифинг барысында Талғат Сәбиев жұмыс жүргізіліп жатқан жобалар туралы айтты.
ТАЛҒАТ СӘБИЕВ, СҚО бойынша экология департаментінің басшысы:
– Булаево қаласы мен Пресновка ауылында қалдықтар полигонын салу жобасы мақұлданды. Алайда, қаржы қажат. Қаражат бөлінсе, жобалар жүзеге асады.
Жобалардың қашан жүзеге асатыны белгісіз. Экология департаментінің басшысы барлық мәселе қаржыға келіп тіреліп тұрғанын тілге тиек етті.
Байболат Құлтанов