Қазақстанда 2024 жылдың қаңтар-қыркүйегі аралығында 1,7 млн-нан астам азамат скринингтен өткен. Нәтижесінде аурулардың 120 мыңнан астам жағдайы ерте кезеңінде анықталған. Бұл туралы денсаулық сақтау министрлігінің сайтында жазылды.
Жеке-жеке қарастыратын болсақ, скринингтердің барысында артериялық гипертензияның 100 мың жағдайы, 20,2 мың қант диабеті, глаукоманың 5 мың жағдайы тіркелді. Биыл анықталған аурулардың саны өткен жылдың сәйкес кезеңімен салыстырғанда 15,5%-ға өскен. Мамандардың айтуынша, аталған дерттер уақытылы анықталмай, бақыланбаса, соңы соқпақты болуы мүмкін.
Сонымен қатар, 2025 жылдан бастап 50-70 жастан асқан ер адамдар үшін 2 жылда 1 рет ми қан айналымы бұзылыстарының даму қаупін ертерек анықтауға арналған скрининг енгізіледі. 15-17 жас аралығындағы қыздар үшін жұлын-бұлшықет атрофиясына қатысты молекулалық-генетикалық тестілеу енгізіледі. Еске сала кетейік, Қазақстанда мынадай ең көп таралған 8 ауруды ерте анықтауға скринингтік зерттеулер жүргізілуде. Олар: артериялық гипертензия, жүректің ишемиялық ауруы, қант диабеті, глаукома, жатыр мойны обыры, сүт безінің обыры, колоректалдық обыр және вирустық гепатиттер.
Қазақстанда ең көп таралған мынадай ауруларға скринингтік зерттеулер жүргізілуде:
артериялық гипертензия (2 жылда 1 рет)
жүректің ишемиялық ауруы (2 жылда 1 рет)
қант диабеті (2 жылда 1 рет)
глаукома (2 жылда 1 рет)
жатыр мойны обыры (4 жылда 1 рет)
сүт безінің обыры (2 жылда 1 рет)
колоректалдық обыр (2 жылда 1 рет)
вирустық гепатиттер (3-6 айда 1 реттен жиі емес).