Санаулы күннен кейін мына отырған сарбаздар үйлеріне оралады. Осыған орай 6637 әскери бөлімінің басшылығы оларға құрмет көрсетіп, мақтау қағаздарымен марапаттады.
Отан алдында борышын абыроймен атқарып, ерекше көзге түскендері қала әкімі, облыстық полиция және қылмыстық-атқару жүйесі департтаменттері басшылығының атынан Алғыс хатпен марапатталды. Тіпті, 20-сы Қазақстанның кез келген қаласындағы жоғары оқу орнында оқуға грант ұтып алған. Барлығы – 145 жігіт әскери борышын өтесе, бәріне түрлі санаттағы әскери шен берілді.
СӘДІР ҰЗАҚБАЕВ, ҚР ҰҰ 6637 әскери бөлімінің жауынгері:
– Тараздан келдім. Осыдан 1 жыл бұрын 6637 әскери бөліміне маман-жүргізуші болып, қатарға қосылдым. Маман-жүргізуші автотехникалық взводта көлік жүргізеді. Осылай бір жыл өте шықты. Сарбаздардың барлығын ұлықтау кешімен құттықтаймын. Көптен күткен сәт жетті, жақында енді үйге ораламыз.
Маңызды күнді асыға күткен сарбаздар бір жылды бірге өткізген достарымызды қимаймыз дейді. Жүрек алып-ұшып үйге тартып тұрса да 12 айда темірдей әскери тәртіптің қызығы мен шыжығын бірге көрді. Бірақ, бұл оларды шынықтыра, жігерлендіре түсті. Сарбаздар биыл тасқын уақытында қаншама тер төкті.
ШУХРАТ ӘШІМОВ, ҚР ҰҰ 6637 әскери бөлімі командирінің орынбасары:
– Сарбаздар осы жылы тасқын уақытында ерекше еңбек етіп, халыққа көмектесті. 9-шы желтоқсаннан бастап 1-ші командасы үйлеріне оралады.
Отан деген ұлы ұғымның байыбына барып, қадірін түсінген сарбаздардың кейбірі білімдерін жалғастырып, басқа мамандықты таңдаймыз десе, көбі әскери жолға бет бұрамыз деп отыр.
Мәдина Қаби