Томағасы сыпырылған жас таланттар теріскейде қауышты. Облыс орталығында Ерік Асқаров атындағы облыстық ақындар мектебінің 5 жылдығына арналған аймақаралық айтыс өтті. Жыр додасына 4 өңірден және Астана қаласынан келген оқушылар қатысты.
Сахна төрінде керекулік және қызылжарлық ақындар. Алдымен шабыттың тұлпарын көрші өңірдің тумасы Мейіржан Баршынбай ерттеді. Ол көрерменмен ізетпен амандасып, қарсыласының өзінен кішкентай екеніне қарамастан аламанға қосылғанына ырза екенін ұйқасты өлеңмен жеткізді. Жас ақын бірнеше қарсыласқа дайындалып келіпті.
МЕЙІРЖАН БАРШЫНБАЙ, айтыскер, Павлодар облысы:
– Аламанның алдын бермей шауып келуге тырысамыз. Менімен бірге жетекшім келді. Мектеп оқушыларының айтысы болғаннан кейін, соған байланысты әңгімелерді айтамыз. Көрменнің ойынан шығатындай айтыс болады деген ойдамын. Айтыста жүргеніме 3 жыл болды.
Айтысты жиналған жұртшылық сүйсіне тыңдады. Көбіне кәусар жырмен сусындауға жастар жиналыпты.
ЖАРҚЫН ЖҰПАРХАН, Е. Асқаров атындағы облыстық жас ақындар мектебінің жетекшісі:
– Мақсатымыз – өзіміз 5 жыл бойы тәлім берген балаларымызға өзге өңірдің мектептерін көрсету. Айтыс ойдағыдай, жақсы өтсе, келесі жылы жалғасын табады. Ендігі жылы ауқымын кеңейтіп, республикалық деңгейде өткіземіз деген ойдамыз.
Солтүстік Қазақстан облысында айтыстың екінші тынысы ашылғаны рас. Қазірігі таңда Қызылжарда от ауызды, орақ тілді ақындардың қатысуымен түрлі деңгейдегі аламандар өтіп тұрады. Мұның артында ұлт жанашырларының тұрғаны жасырын емес. Бүгінгі айтыста демеушілік танытып және жөн сілтеп жүрген бірсыпыра азамат марапатталды.
Мәдина Қаби