Тіл мен мәдениет мәселесі «Miras» кеңесінде талқыланды. Облыстық мәслихат депутаты әрі аталған ұйымның төрағасы Ербақыт Амантайды ауылдағы халықтың азайып жатқандығы алаңдатады. Солардың арасында жергілікті ақын-жазушылардың атындағы музейлер орналасқан елді мекендер бар. Нысанның шалғай орналасқаны, жолдың нашарлығы, адамдардың үдере көшуі. Салдарынан сол жердегі мәдениет ошағына барушылардың да саны кеміген көрінеді.
ЕРБАҚЫТ АМАНТАЙ, «AMANAT» партиясы СҚОФ жанындағы «Miras» кеңесінің төрағасы:
– Жамбыл ауданында Жаңажол деген Ғ.Мүсіреповтің ауылы бар және С.Мұқановтың ауылы, С.Шаймерденовтың ауылы Амангелді бар. Шал ақын ауданында Еңбек Қоңырбаевтың Көктерек деген ауылы бар. Сол жерлерде олардың қолданған заттары жететін. Сол заттардың көбі қолды болып кеткен.
Мәселен, Сәбит ауылында бес-ақ үй қалған. Уақыт өткен сайын ондағы азын-аулақ ағайынның басқа жерге көшпесіне кім кепіл?
Ал сол жерлерде қалған құнды дүниелерді бір орынға жинау қажет дейді Ербақыт Амантай.
ЕРБАҚЫТ АМАНТАЙ, «AMANAT» партиясы СҚОФ жанындағы «Miras» кеңесінің төрағасы:
– Жаңажол ауылының да жағдайы мәз емес. М.Жұмабаевтың ауылы Сарытомар да бар. Бірақ, қаладан 200-300 шақырым жерге кім экскурсияға барады? Сондықтан, облыс орталығында бір мәдениет үйін ашу керек деген ұсыныс түскен еді.
Мәселе өзекті. Оны кеңес мүшелері жан-жақты таразылап, талқыламақ.
Жиынға қатысушылардың талқысына түскен тағы бір мәселе – қазақ тілінің бүгіні. Жылдар жылжап жатқанымен әкенің қанымен, ананың сүтімен берілген тіліміз аяққа мықтап тұрып, алшаң басар емес. Мағжан сенген жастардың арасында өзге тілде шүлдірлегендердің саны басым дейді дәстүрлі әнші Біржан Есжанов.
БІРЖАН ЕСЖАНОВ, дәстүрлі әнші, Ақан сері атындағы облыстық филармонияның көркемдік жетекшісі:
– Біздің кейбір жастардан Абай жолын сұрасақ, білмейтіндер қаншама. Балқадиша кімнің әні екенін білмейтіндер жететін. Оның барлығы – тәрбиелік мәні бар дүниелер.
Жиынға қатысқан тіл жанашырлары мемлекеттік тілдің қолданыс аясын кеңейту мақсатында білім беру мекемелерінде қазақ тілі үйірмелерін ашу қажеттігін айтты.
Мәдина Қаби