Қарашаның 14-16 аралығында Астанада “Worldskills Kazakhstan-2024” республикалық чемпионаты өткен болатын. Байқауда өңір намысын 18 студент қорғады. Оның ішінде Бәйкен Әшімов атындағы Петропавл машина жасау және көлік колледжінің студенттері айды аспаннан бір-ақ шығарып, 1 алтын және 1 күміс медаль еншіледі. Бұл – тарихи жетістік. Себебі, аталған білім ордасында “Worldskills” чемпионаттарында жеңімпаз атанған жас шыққан емес. Бүгін жігерлі жастар өздері оқып жатқан оқу орнына оралды. Оларды ұстаздары мен артынан өсіп келе жатқан ізбасарлары құрметпен қарсы алды.
ВАСИЛИЙ ШАБАНОВ, “Worldskills Kazakhstan-2024” республикалық чемпионатының жеңімпазы:
– Осы чемпионатқа былтыр да қатысқан болатынмын. Ол кезде жүлделі орынға сынық сүйем жетпей қалды. Бірақ, мен мойыған жоқпын. Сол жарыстан кейін 1 жыл бойы тынымсыз дайындалдым. Кеткен қателіктермен жұмыс істедім. Мен өнер көрсеткен құзыреттілікті көбі түсіне бермейді. Ең алдымен компьютер арқылы бағдарлама енгіземіз. Содан кейін құрылғыны іске қосамыз. Оны болған соң бізге берілген материалды әдемілеп кесуіміз керек. Бұл жерде қателесуге мүлдем жол жоқ. 1 миллиметрдің өзі зор рөл атқарады.
Байқауда Василий Шабанов “ЧПУ станоктарындағы токарлық жұмыс” құзыреттілігі бойынша сынға түсті. Жігерлі жастың сөзінше, берілген тапсырмаларды орындау оңайға соқпаған. Бұл сайыс талабын көп адам түсіне бермейді. Айта кетейік, Мемлекет басшысы Қасым-Жомарт Тоқаев 2025 жылды “Жұмысшы мамандықтары жылы” деп жариялады. Ал “Worldskills Kazakhstan” чемпионаты – сол мамандарды кәсіби дағдылары мен заманауи техникалық білім беру сапасын арттыруға арналған ең ірі байқау.
ПАВЕЛ СЕНЬКИН, Б. Әшімов атындағы Петропавл машина жасау және көлік колледжі директорының орынбасары:
– Елімізде “Worldskills” чемпионаты осымен 9-шы рет өткізілуде. Солтүстікқазақстандықтар жарысқа 4-ші рет қатысты. Биыл 18 бала апардық. Өңір жастары 2 алтын, 2 күміс, 3 қола медаль жеңіп алды. Жылда құр қол қайтпаймыз. Байқауда қатысушыларға күн сайын әр түрлі тапсырмалар берілді. Оларға тапсырмаларды барынша тез және сапалы істеу қажет болды.
Айта кету керек, “Worldskills Kazakhstan-2024” республикалық чемпионатында 30 кұзіреттілік бойынша 500-ден астам студент сынға түсті.
Нұрасыл Ахмет