Аққайыңдар өлкесінде ат шаптырым аумақтарда дән егіп, астық оратын, мал жайып, сүт пен ет өндіретін жандар жетерлік. Солардың барлығын жіпке тізсек, ұшар басында кімнің тұрары да белгілі. Геннадий Зенченко – мыңдаған адам мойындаған ауылшаруашылық тауарөндіруші. Ол бұл салада ондаған жыл жемісті тер төгіп келеді. Ал қажырлы еңбек елеусіз қалмайтыны түсінікті. Күллі өңір мақтанар азаматтың мерейі өткен аптаның соңында кезекті мәрте үстем болды. Бұл жолы диқанға елорда төрінде қошемет соғылды.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
– Астанада Ауыл шаруашылығы еңбеккерлерінің бірінші форумы өтті. Сол жиында Мемлекет басшысы Қасым-Жомарт Тоқаев жерлесіміз Геннадий Зенченконы «Қазақстанның Еңбек Ері» атағы және «Отан» орденімен марапаттады. Бұл – барша облыс үшін айтулы оқиға. Солтүстікқазақстандықтар атынан сізді шын жүректен құттықтаймын! Сіз осындай жоғары наградаға лайықтысыз. Еңбегіңіз жемісті болсын!
Жоғары дәрежедегі қос награда жерлесіміздің кеудесіне бірнеше жайтты саралай келе тағылғанын түсіну қажет. Геннадий Зенченко еліміздің азық-түлік қауіпсіздігін қамтамасыз етуге және экспорттық әлеуетін арттыруға сүбелі үлес қосып отыр. Тағы бір маңызды жайт, диқан кіндік қаны тамған Новоникольское селосын таңдай қақтырарлық деңгейге жеткізді. “Ауылына қарап, азаматын таны” демекші, Қазақстанның Еңбек Ері тұрғындарына қолайлы жағдай жасады.
ЕРКЕБҰЛАН МӘМБЕТОВ, ҚР Парламенті Мәжілісінің депутаты:
– Біздің жерлесіміз осындай жоғары жетістікке жетіп отыр. Бұған өзім қатты қуандым.
ЕСКЕНДІР ЕЛЕУСІЗОВ, СҚО ардагерлер кеңесінің төрағасы:
– Сіздің еңбегіңіз – көпке үлгі. Өзіңіздің ісіңізбен, қадір-қасиетіңізбен жоғары жетістікке жетіп отырсыз. Ардагерлер атынан құттықтаймын!
Геннадий Зенченконы танитын адамдардың барлығы оның ұстамды әрі қарапайым екенін алға тартады. Бұл пікірмен келіспеу мүмкін емес. Өзіне құрмет көрсетілген бүгінгі жиын барысында да атақты азамат залда отырған жандарға, қарамағындағы қызметкерлеріне бас ие алғыс білдірді.
ГЕННАДИЙ ЗЕНЧЕНКО, Қазақстанның Еңбек Ері:
– Шындығына келсем, әлі не болып жатқанын түсіне алар емеспін. «Қазақстанның Еңбек Ері» атану, Президент қолынан марапат алу – баға жетпес құрмет. Мен – әкемнің жолын жалғастырушымын. Ол үнемі тер төгіп, қарапайым болу қажеттігін айтты. Баламды да солай тәрбиеледім. Бүгінде жерге қаратпай жұмыс істеп келеді. Немерем өсіп келеді, әзірге, оның болшақта кім боларын білмеймін. Баршаңызға алғыс айтамын! Қызметкерлеріме ризашылығым шексіз, еңбексүйер ұжымым болмағанда мұндай жетістікке жетпес едім.
Біле жүрген маңызды, «Қазақстанның Еңбек Ері» атағын санаулы солтүстікқазақстандық алған. Соның бірі – Геннадий Зенченконың әкесі Геннадий Зенченко.
Байболат Құлтанов