Жағымды жаңалық! Петропавлда мүмкіндігі шектеулі адамдарға арналған автомектеп қайтадан іске қосылады. Көпшілік білетіндей, оның негізін қалаушы – белсенді жерлесіміз Сәлімхан Сәбитов.
СӘЛІМХАН СӘБИТОВ, “Равная дорога” автомектебінің директоры:
– Бұл жоба 2018 жылы ҚХА қолдауымен бастау алды. Алғашқы жылы 24 адам оқыды. Оның 10-ы – мүгедек адам. Қазір сол 10 адамның 4-еуі өздеріне көлік сатып алып, қалада жүріп жүр.
Пандемия болмағанда Қазақстанның бірде-бір өңірінде жоқ автомектеп адамдардың бірнеше легін оқытар еді. Осы орайда техникадан хабардар тұрғындардың құлағына алтын сырға! Көпшіліктің арманын орындаған Сәлімхан Сәбитов маман қажет дейді, ал тізгіндейтін көлік бар.
СӘЛІМХАН СӘБИТОВ, “Равная дорога” автомектебінің директоры:
– Қазір автоинструктор іздеп жатырмын. Жобаны биылғы мамырда бастаймын деп ойлағанмын. Жоспарға су тасқыны өзгеріс енгізді.
Алексей Маслов – әзілге жақын петропавлдық. Ол бірегей автомектепті алғашқы лектің қатарында тәмамдапты. Бүгінде көліктің құлағында ойнайды.
Көлікті еркін оталдырып, артқа қиындықсыз шегінген Алексей Маслов жобаға сұраныстың аса жоғары екенін айтады. Сөзінше, оқу қиынға соқпаған.
АЛЕКСЕЙ МАСЛОВ, “Равная дорога” автомектебінің түлегі:
– Ең бірінші сабақта 15 минуттай қобалжыдым. Қорықтым десем де болады. Кейін үйреніп алдым. Алдымен қаланың сыртында, сосын ішінде 58 сағат жүрдік. Емтихан тапсырғанда тағы рөлге отырдым. Осылай арманыма жеттім. Әзірге, өзімнің көлігім жоқ. Болашақта алғым келеді.
Бұған дейін жоба авторына Шымкент қаласынан және Ақмола, Қостанай сынды облыстардан хабарласқан. Ерекше идея иесі Сәлімханды өздеріне шақырыпты. Ал кейбірі Петропавлға келіп те оқымақ екен.
СӘЛІМХАН СӘБИТОВ, “Равная дорога” автомектебінің директоры:
– Өңірлерде жастармен кездесемін. Сонда осы жоба жайлы айтсам, кәсіпкерлер қолдаймыз дейді. Шын мәнінде, оңай жоба емес. Ол басталған соң жалғасын табуы керек. Елімізде оқығысы келетін адамдар өте көп.
Сәлімхан Сәбитов жүргізуді үйрететін адамды асыға күтеді. Егер маман табылса, жоба жақын арада басталады.
Байболат Құлтанов