Теріскейлік жастар зор мүмкіндік иеленді! С.Мұқанов атындағы облыстық кітапхана қабырғасында шығармашылық зертхана ашылды. Бұл – Қазақстан мен АҚШ бірлесе жүзеге асырған тың жоба. Заманауи орталықта өскелең ұрпақ робототехниканың қыр-сырын меңгереді, бастамаларын жүзеге асырады.
ЖҮСІП ЖҰМАҒҰЛОВ, СҚО әкімінің орынбасары:
– Заманауи жабдықтармен жарақталған зертхананың ашылуына Америка Құрама Штаттарының Қазақстандағы елшісі арнайы келді. Біреу білсе, біреу білмес, Петропавл – Makerspace өнертапқыштар орталығы ашылып отырған еліміздегі 7-ші қала. Бұған дейін республиканың ірі мегаполистерінен бөлек, Орал, Өскемен, Павлодар сынды шаһарларында таспасы қиылыпты.
ДЭНИЕЛ РОЗЕНБЛЮМ, АҚШ-тың Қазақстандағы елшісі:
– Ашылып отырған орталық арқылы Петропавлдың қарқынды дамып келе жатқан шығармашылық қауымдастығына қолдау көрсетеміз. Біз – осы аймақтағы инновациялардың бір бөлігіміз. Бұған өте қуаныштымыз. Қала жастарының оқып, үйреніп, заманнан қалмай өмір сүретіндеріне кәміл сенемін. Жоспарланған курстардың барлығы тегін өтеді. Жастарды осы жерге шақырамын!
Таудай талапты ұл-қыздарға орталықтың есігі әрқашан ашық. Мұнда білікті ұстаздар қызмет етпек. Олар жастарға саланың бүге-шүгесін үйретуге дайын.
Мәдина Қаби