Жаңа жатақхана Театральная көшесінде орналасқан. 4 қабатты ғимаратта 156 студент орналасады. Сондай-ақ, сырттан келген оқытушыларға арналған 25 пәтерлік бөлме бар.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
– Болашағымыз – сіздердің қолдарыңызда. Қазір жастарға бар жағдай жасалып жатыр, мүмкіндік көп. Сондықтан, сіздерге ең алдымен денсаулық және оқуда озат, табанды да талапты болуды тілеймін. Жақсы, нарықта сұранысқа ие маман болып шығуға тілектеспін. Әрдайым жолдарыңыз ашық болсын.
М.Қозыбаев атындағы СҚУ еліміздегі университеттердің арасынан іріктеліп, академиялық шеберлік орталығының құрамына кірді. Енді білім ордасына ғылыми-зерттеу әлеуетін арттыру үшін жыл сайын 4-5 млрд теңге қаржы бөлінбек.
НҰРБЕК САЯСАТ, ҚР Ғылым және жоғары білім министрі:
– Біздің келесі мақсат – осындай өңірдегі университтерді Халықаралық зерттеуші университеттерге айналдыру. Қазір Аризонадан келген әріптестер ғылымның, білімнің дамуына және жаңа зерттеуші академиялық стандартты енгізуге көмектеседі. Арнайы келісімшарт бар. Келесі 4-5 жылдың ішінде Қозыбаев унимверситетіміз ақырындап трансформациядан өтеді. Халықаралық стандарттарға көшеді.
Жергілікті жоғары оқу орны мен Аризона университеті арасындағы серіктестік 2022 жылы басталды. Бүгінгі таңда қосдипломдық бағдарлама аясында 1000-нан астам студент білім алып жатыр.
ДЖЕННИ ЛИ, Аризона университетінің вице-президенті, АҚШ:
– Кеше біз университет ғимараттарына барып, инфрақұрылыммен жақынырақ танысуға мүмкіндік алдық. Жоғары оқу орнының дамығанына куә болдық. Зерттеу орталықтары ашлып, ғылым саласының одан әрі дамып жатқанына қуаныштымыз. Ең бастысы, бұл қосдипломды бағдарлама және жаңа жобаларымыз барлығымыз үшін сәтті болады деген сенімдемін.
Жаңа жатақхана замауани талаптарға сай жабдықталған. Студенттер мен оқытушылар үшін керекті жиһаздың барлығы бар. Айта кетейік, бұл ғимарат облыс әкімдігінің қолдауымен салынды.
АЗАМАТ ЖИКЕЕВ, М.Қозыбаев атындағы СҚУ басқарма мүшесі:
– Бұл жатақханада студенттермен қатар Аризонадан арнайы оқутушылар да тұратын болады. Жалпы, біз оқу орнымызда оқитын барлық студенттерді жатақханамен қамтымақпыз. Тағы 1200 орынға шақталған студенттер үйінің құрылысы жүріп жатыр.
Жалпы, М. Қозыбаев атындағы университетте барлығы – 6 мың білім алушы оқиды. Жатақханаларда 1400-ге жуық студент тұрады.
Данаш Хамза